Dit hebben wi för Jo an Boord

För uns is van Belang, dat wi uns upnanner verlaten, dat wi ‘t mitnanner all torecht kriegen un ok fiern könen. Mit minn Woorden: Sünner Teamarbeid gungen wi gau unner. Wi stahn för dat Prinzip: „An besten warken wi tosamen, wenn wi uns kennen doon.” Dat Kennenleren fangt bi uns al daar mit an, dat Ji good inarbeidt word un deelnehmen an de „Neei-bi-NPorts-Dag“ of Azubi- Dag. Regelmatig beden wi Mitarbeidergesprecken an, so word dat mögelk, dat wi neet blot over alldaagse Angelegenheiden mitnanner proten, vööl mehr könen wi Feedback geven un kriegen. (Feedback, dat bedüddt sowat as torüggspegeln.) Uns Teamwark finnt persönelk vör Oort statt un digitaal in uns Social Intranet. So is dat mögelk, dat wi Informationen in uns Ofdelens un nett so gau in uns enkele Steden uttuusken.

NPorts is ‘n Arbeidgever, up de du di verlaten kannst: Neet blot, dat dat Gehalt up TIed kummt, daar kummt noch wat bovenup an ‘t Enne van ‘t Jahr, un wi kümmern uns daarum, dat Ji ok good versörgt in ‘t Oller sünd (VBL) - un dat finanzeren wi to ‘n groten Deel. Un neet tolest beden wi uns Lüü ‘n sekere Arbeidsstee. As 100%ige Dochter van ‘t Land Nedersassen gellt för uns bovendeem de Tarifvertrag der Länder (TV-L). Man wat bedüddt dat egenlik? Simpel verklaart dit: De Minsken, de bi uns anstellt sünd, worden indeelt in verscheden Lohngruppen, dat hangt daar van of, wat se leert of studeert hebben. Un so lang se bi NPorts blieven, rücken se automatisch - na fastleggt Tieden - ‘n Stuuf hoger, un daar gifft dat denn ok weer mehr Geld in de Lohnpüüt. Togliek gifft dat ok daardör mehr Gehalt, dat de Gewerkschaft dat för de uthannelt, de wi in Arbeid hebben.

Blot Schippen, Kaikanten un Water - dat is ‘n Haven? Daar steiht vööl, vööl mehr d’r achter. In uns allmitnanner 15 Steden sörgen wi elke Dag för ‘n glatte Bedriev in de Havens. So worden to ‘n Bispill uns Kaianlagen un Liggplaatsen van uns Havenbau-Team (dat besteiht ut Bauingenieuren, Technikers, Bau-Upsehers, techniske Tekeners un ‘n heel Bült mehr) plaant, baut un in Stand hollen. För de Slüsen in uns Havens bruken wi Spezialisten - Mannlüü un Fraulüü, de Künne hebben van Elektotechnik un Maschinenbau. Un weer sünd dat Fraulüü nett so good as Mannlüü, de as Nautikers för ‘n sekere Fahrt in d’ Haven sörgen un de Crew an Boord van uns Arbeidsschippen daar insetten, wor se bruukt worden. Dat Spektrum van Beropen reckt van Kooplüü bit Havenkaptain. Maakt Jo an besten sülvst en Bild van all de vöölklörige Upgaven in en Haven.

Wi hebben ofproot, wo wi mitnanner umgahn, mitnanner arbeiden un well wat to seggen hett. Dat is de Grundlaag, för ‘n fruchtbaar Mitnanner. Wat daar an Weerten in sitt (so as: Up uns kannst di verlaten, kannst vertrauen, wi weten van Verantwoorden, stönen un entwickeln neje Ideen, sünd ehrelk, hollen vööl van Teamwark, achten nanner, proten mitnanner, strieden ok geern maal), gifft uns ‘n Kompass daarför, wo wi tegensiedig mitnanner umgahn in d’ Olldag, an de Warkeldagen.So hebben wi ‘n faste Rahm för uns Doon un Laten, för elk un een, nett gliek, waar wi arbeiden un mit welke Upgaven wi uns befaten.
Mitnanner wat beleven - so worden wi gewahr, dat wi tosamenhören, dat een för de anner instahn mutt. Up uns Team-Event Jahr för Jahr komen wi an een van uns Stejen to ‘t Boßeln un „Utflippen” binanner. Dat is al Tradition, und sörgt för uns Teamgeist un dat wi open mitnanner umgahn.

Dat Ut- un Wiederbillen steiht bi uns an boverste Stee. So billen wi vööl mehr Lüü ut as wi bruken un umsörgen hör up ‘n hoge Peil. Man neet blot de, de wi utbillen, worden vöruthulpen, Na uns Dünken is dat ok van groot Belang för de Qualität van uns Wark, dat wi uns Fack- un Führungslüü alltied wiederbillen. Zentraal is daarbi de Datenbank för Fort- un Wiederbillen in uns Soziaal Intranet, in de wi over 160 Angeboden för ‘t Wiederbillen vörstellen. Daarbi gifft dat ‘n Unnerscheed tüsken Angeboden för en Fack, un Angeboden, de over ‘t Fack rutgahn. So kann een sük in sien Fack qualifizeren för dat, wat up sien Rebett villicht noch beter kunn. Bi de Angeboden, de over dat enkelte Fack herutgahn, geiht dat besünners um Führung, wo een sük verhollen sall bi de Kommunikation of in Konflikten.
So sörgen wi d’rför, dat de Minsken, de bi uns hör Stee un Utkomen hebben, good utbildt sünd un alltied noch wat beter worden.

För uns steiht fast, dat uns Mitarbeiderskes un Mitarbeiders blot denn ‘n freje Kopp hebben för hör Upgaven, wenn se Beroop un Familie overeen brengen könen. Daarum hebben wi in uns Unnernehmen de Seils so sett, dat de Overeenbrengst van Beroop un Familie fast verankert is. Wi sünd ‘n zertifizeerte familienfrünnelk Arbeidgever.
Bi uns gifft dat unner annern Fraulüü un Mannlüü, mit de een geern un to elker Tied proten kann over all dat, wat mit de Familie tosamenhangen deit: En Leiddraht to ‘n Torüggkomen na de Ollerntied, verscheden Modellen för Arbeidsstee un Arbeidstied nett so as ‘n egen Beroop-un- Familie-Portaal in uns Soziaal Intranet. Informationen un Tipps to Angeboden van Kinneruppass, Moderschutz, Ollerntied, Ollerngeld, Pleeg van Nahsten in de Familie un vööl mehr sünd daar to finnen.

Uns liggen gesunde Mitarbeiderskes un Mitarbeiders an ‘t Hart, de wat leisten könen un motiveert sünd. Daarum hebben wi siet Jahren en lebennig Bedrievs-egen Gesundheits-Management, (kört: BGM).
Uns BGM-Team organiseert regelmatig Gesundheidsweken un Aktionsdagen to Themen as daar sünd Ernähren, Bewegen, Stress minnerseren of ok Wegkomen van ‘t Smöken. An eerste Stee van all Themen steiht bi dat Team de Fitness. Wi beden uns Mitarbeiderskes un Mitarbeiders an, dat se Lidd worden bi Hansefit.
Un ok buten de Fitnessstudios sünd wi mit Sport unnerwegens: ‘t gifft verscheden Sportklottjes in uns Bedrieven, as daar sünd Kutterpullen, Football, Lopen, Drakenbootfahren, Bowling usw.

Uns Havens mutten de hele Dag un to elke Tied in Gang wesen. Um dat de Anförderns so verscheden sünd, hebben wi ’n hele Antahl van Modellen för de Arbeidstied. Van Gliedtied, faste Arbeidstieden, Schichtarbeid bit Home Office is ‘t all to hebben. Flexibilität word daarbi van beid Kanten verwacht: Van de Warknehmers nett so as van de Arbeidgever. In en Dialoog entwickeln wi
wiss ‘n Lösung för Arbeidstied un Arbeidsstee. Dat is för uns van Belang - wi weten, dat neet elke Arbeidstiedmodell to elke Levensphase passen deit, un dat de Minsken, de bi uns arbeiden, um heel verscheden Lösungen verlegen sünd. So kann ‘t wesen, dat na ‘n Pause wegen de Familie de Arbeidstied reduzeert worden sall of mutt, of heel gau in ‘n Pleegsituation ‘n Verannern van de Arbeidstied nödig is. Un de arbeiden deit, mutt sük ok verhalen, Na uns Tarifverdrag beden wi all uns Lüü 30 Dagen Urlaub in ‘t Jahr. Ok hier entwickeln wi uns wieder un arbeiden an en Regelwark för Mini-Sabbaticals un dat een ‘n Deel van sien Lohn in freje Dagen umwanneln kann, un dat so, wenn ‘t denn maal mutt, de nödige freje TIed mögelk is.

Mitarbeiden in de Bedrievsraad bedüddt, Verantwoorden to overnehmen. Uns elf Leden hebben daarum alltied ‘n open Ohr für all knapp 700 NPorts-Beschäftigten. Se vertreden de Interessen van de Arbeidnehmerskes un Arbeidnehmers as dat in ‘t Gesett för de Mitbestimmung fastleggt is. Gesundheid, Arbeidsschutz, Gliekstellen van Fraulüü un Mannlüü, Overeenkummst van Beroop un Familie, soziale Themen un vööl anner Fragen worden bovendeem in regelmatige Terminen mit de Geschäftsföhren diskuteert.
De Bedrievsraad hett ok sien Upgaven in verscheden Gremien, so in de Utschuss för Arbeidsschutz, in de Utschuss för de Wirtschaft of de Arbeidskring „bedrievsegen Gesundheidsmanagement“.
Futt d’r mit bi wesen: Uns Jöögde- un Utbillensvertreden kümmert sük um de Belangen van de jung Lüü.