Uns Stee in Emden

Wi in Emden

De Haven van Emden verdeelt sük haast over ‘t hele Gebied van de Stadt. So is ‘t ok neet verwunnerlik, dat uns Stee in Emden de meesten Kolleginnen un Kollegen tellt: ruugweg 210 Mitarbeiders un bovendeem sowat 20 jung Lüü, de utbildt worden. Man wi sitten neet all unner een Dack, wi warken an verscheden Stejen.

Dicht bi ‘t Zentrum van de Stadt liggt dat grote Bauwark, waar Mitarbeiders ut ‘n Bült verscheden Rebetten binannerkomen (dat Leid van NPort Emden, Koopmanns-Angelegenheiden, Technik, Immobilien, Personal un Verwalten). In de Werftstraat sitten de Lüü van ‘t Rebett Technischer Service. De Kolleginnen un Kollegen van ‘t Port Office sitten direkt an de Grote Seeslüüs.
 
An d’ Süüdkai finnen wi de Emder Kraanbedriev un an d’ Noordkai de Kolleginnen un Kollegen van dat Stellwark un de Borssumer Slüüs.

Um dat wi so ‘n bietje wieder vannanner weg arbeiden doon - of villicht nett daarum - brengen wi Emders uns Fieravenden geern mitnanner to. Of bi ‘t gemeensaam Training up Water up een van de völen Grachten van de Stadt in ‘t Drakenboot, of an Land bi ‘t Footballspölen (leep geern ok tegen de Nörders).

NPorts Team beim Drachenbootrennen im Hafen Emden

Ok bi Loopweddstrieden sünd wi geern mitnanner daar mit bi. All Jahr to ‘n Bispill bi ‘t Matjesloop in Emden of bi de Vull-Wat-Manns-Loop in Leer.
Elke Jahr in d’ Sömmer veranstalten wi ‘n Sömmerfest, un in d’ Dezembermaant gifft dat ‘n grote Wiehnachtsfier för all, dat wi womögelk noch mehr tosamenhollen.

Arbeiden bi NPorts

hier geiht dat to uns aktuelle freje Stejen, de wi anbeden.

Personaal-Ofdelen

Albert de Freese

Baas Personaal / Verwalten in Emden

Friedrich-Naumann-Str. 7-9
26725  Emden
T: +49 (49 21) 897101
bewerbung-emden(at)nports.de

Uns Emden

Emden is för heel vööl Minsken „de Stadt, waar Otto tohuus is”. Man daar gifft dat ‘n heel Bült mehr to entdecken. De Stadtgeschichte van 1200 Jahr is togliek de Geschichte van de Seehaven, un ok Frünnen van Künst. Kultur un Sport könen d’r good mit hen.

Freeitied / Kultur

Van ‘t Water ut lett sük de Stadt wunnerbaar beleven, mit Kanu of „Waterfiets” (Tretboot) up all de Grachten. Bovendeem is Emden upfallend gröön. Daar is de Wall, de de Binnenstadt kumpleet umfaat, un ‘t gifft ‘n Riege Parks un gröne Stejen, de Jo nögen to ‘n lüttje Utstapp.

Up ‘t Rebett van Kultur kann de Havenstadt ok heel wat beden: Utstellens, Vereensfesten, Flohmarkten, Theater, Kabarett, Workshops, Leesavenden, en internationaal Filmfest un Kunzerten van all Soorten. De Emder Kunsthalle, de Henri Nannen sien Heimatstadt schunken hett, is wied un siet bekennt un en Besöök lohnt sük alltied. Butendeem gifft dat ‘n Riege Museen un Museumsschippen - de Herengslogger AE 7, dat Füürschipp Amrumbank un de Reddungskrüzer Georg Breusing - de all dree in d’ Delft liggen.

Neet to vergeten „Dat OTTO-Huus”, daar mutt elke Fan van de Blödel-Barde Otto Waalkes maal west wesen. Un denn lohnt ok de Visiet van ‘t Ootfreeske Landesmuseum futt tegenover in ‘t olle Raadhuus - daar worden Ji vööl gewahr over 1200 Jahr Emder Histoorje.

Un dürt ‘t ok ‘n bietje Meer wesen? Denn brengt Jo de Fähre of ok de HIgh-Speed-Katamaran up dat Eiland Börkum. Mehr Informationen för disse un anner Uflüggten gifft ‘t up de Sieden Touristik- Sieden van de Stadt Emden.

Kinneruppass / Utbillen

Kinderbetreuung
De Stadt Emden kann 30 Inrichtens anbeden, waar Kinner over Dag versörgt worden. Anmellen geiht ok online: „Anmeldeportal Emden“ (Dat mutt in d’ Määrt geböhren för de Augustmaant).

 

Scholen / Hoogschool
In Emden hett ‘n vöölklörig School-un Utbillenslandskupp mit verscheden Grundscholen, Oberscholen, Gymnasien, mit ‘n Integreerde Gesamtschool un ‘n Förderschool, daarto twee Beroopsscholen. Up de Sied van de Stadt Emden worden Ji mehr gewahr over dit Thema. Studerende finnen an de Hoogschool Emden-Leer mehr as 30 Studiengangen.

Vekehrsanbinnen

Emden liggt direkt an de Autobahn A 31, de na Süden föhrt. Over ‘t Dreehook Leer un de A 28 geiht dat in ‘n lüttje Stünn na Ollenbörg un wieder na Bremen. Ok de Weg to uns Nabers in Nederland is neet wied: Over de Autobahn is ‘t ‘n gode Stünn na Groningen, un ok de Havenstadt Eemshaven lett sük besöken.
Na Noorden hen sünd Ji in ‘n Dreevördelstünn an de düütse Noordseeküste. Van Emden gifft dat ‘n Fähre na Börkum, van Nörddiek na Juist un Nordernee. De anner Eilannen hebben hör egen lüttje Sielhavens.

Mit de Zug is Emden good to berecken. Of Intercity of Regionalexpress: Meesttieds van Nörddiek ut fahrt de Bahn over Emden na Ollenbörg, Bremen Hannover, Leipzig, Köln of Münster. Un ok annersum, natürelk.

Van de Fleegplatz Emden ut könen Ji all oostfreeske Eilannen anflegen. De nahste internationale Fleeghavens sünd Groningen in Nederland (120 km wied weg) un Bremen.

To'n Stee in Emden

Frei übersetzt durch Carl-Heinz Dirks/ Emden. Hier geht’s zur deutschen Seite.